(کابل ټکی کام، ۱۳۹۷، کب ۶)
د جرمني مشهور د ښکلا ډيزانر “کارل لاګر فيلډ” چې شاوخوا پنځه ورځې مخکې ومړ، يوه پيشو ترې پاتې شوې چې ښايي د هغه د کروړونو ډالرو څښتنه شي.
د راپور له مخې، د فبرورۍ په نوولسمه نيټه کارل لاګر د پنځه اتيا کلونو په عمر ومړ خو په وصيت نامه کې يې د يواځينۍ پيشو “شوپيټ” نوم هم شامل دی. اوس ويل کېږي چې ښايي دغه پيشو ته د هغه له جایداد څخه شل کروړه ډالره ورکړل شي.
کارل له خپلې پيشو سره زياته مينه لرله، ډيری پروګرامونو ته به يې له ځان سره وړله او هر وخت به يې په غيږ کې نيولې وه.
دغه پيشو چې ډيره مشهوره ده او نوم يې د ښځو د جامو پر يوه ډيزاین هم شته ، دغه راز د شوپټ په نوم په سوشل ميډيا يو اکاونټ هم لري چې شاوخوا دوه لکه فالورز لري.
