کابل ټکی کام عبدالله هاشمي
عیني شاهدان وايي، د سوريې په ورقه ښار کې یوه داعشي خپله مور وروسته له هغه، په عام محضر کې ووژله چې زوی ته يې زارۍ وکړې ترڅو د داعش له تنظیم څخه لاس واخلي.
شل کلن علي سقر د خپلې مور لینا په اړه د داعش مشرانو ته خبر ورکړی وو، چې له ده څخه غوښتنه کوي ترڅو د داعش تنظیم څخه ځان بېل کړي او ورقه ښار پرېږدي.
ځايي خلک وايي، د مور او ځوی ددې لانجې په تعقیب کې داعشي مسؤلینو ښځه ونیوله او د ارتداد حکم يې پرې جاري کړ.
د چهارشنبې په ورځ د ورقه ښار په یوه چوک کې، دغه زوی، د سلګونه خلکو په مخکې، خپله مور په ډزو ووژله.
رامي عبدالرحمن وايي چې ښځه د څلويښتو کالو په عمر کې وه، د طبقه ښارګوټي په څنډه کې اوسيده او د ورقه په ښار کې یې دنده ترسره کوله.
په ټولنیزه رسنیو کې دغه پېښه په عامه کچه سخته غندل شوې ده، او زوی یو کم عقل دوزخي بلل شوی دی.
ورقه ښار د داعشیانو تش په نامه خلافت مرکز دی چې خپل ټول نظام له همدې ځایه پر مخ بیايي.
د داعش ډله په ورقه ښار کې د روژې نه نیولو، لمونځ نه کولو، زیارت ته په تللو، له داعش ډلې سره په نه یوځای کېدلو، او د داعش مشر ته په ښکنځلو خلک اعداموي.
ویل کېږي که چېرې دوی په سیمه کې یو کس په دې تور ونیسي چې له داعش ډلې سره مخالفت لري بغیر له کومې محکمې یې وژني.
داعشیان د خپلو مخالفینو ماشومان غلامان او ښځې وینځې ګڼي، او پر هغوی جنسي تېرۍ خپل شرعي حق بولي.
له ۲۰۱۱ م کال راپدېخوا چې په سوریه کې د داعش ډله منځ ته راغلې، له دوه لکه او شپيته زره څخه زیات انسانان وژل شوي دي.
