شعر/ مدثر همراز
ټول شیندلي اندامونه،
د غزې ګورم عکسونه
دا دی بیا بل شوه اورونه
دا دی بیا اوري بمونه
د غزې داستان د ظلم،
پرې به ډک شي کتابونه
تاریخونه ترې عاجز دي
ورته ژاړي تاریخونه،
که عرب دي که عجم دي
پټه خوله دی ټول قومونه
د نړۍ مسلمانان دي
میلونونه میلیاردونه
اسلام څه شو غیرت څه شو
های های ستاسو دریځونه
خدایه ما سره به څه کړې،
په اور سوزی زما ورونه
زه افغان یمه ورځمه
درته کړم دغه سوالونه
ورتلی نه شم لاره نشته
راته جوړ کړه کودرونه
همراز بوزه فلسطین ته
بس همدا یې ارمانونه
ربه یم عاجز بې وسه
ناست یم لیکمه شعرونه
