جلال ريحان
د کابل ګارنيزيون ويلي، چې د شهيد اونۍ لمانځلو په پلمه هيڅ ډله او کس ته اجازه نه ورکوو، چې د موټرو له کتارونو او وسلو سره د ښار واټونو ته راووځي.
د کابل ګارنيزيون قومندان ګل نبي احمدزی وايي، چې د امنيتي ادارو له پرېکړو سره سم به افغان ځواکونه هيچاته اجازه ورنکړي، چې له وسلو سره واټونو ته راووځي او د خلکو پر مخ لارې وتړي.
د ګارنيزيون قومندان خبرداری ورکوي، که دا ځل چا دا ورځ د ناقانونه وسلو او موټرو په ګرځولو ولمانځله قانوني چلند به ورسره وشي.
نن د سنبلې ۱۸ ورځ د جمعيت اسلامي ګوند د پخواني وژل شوي قومندان احمدشاه مسعود له ۱۶ تلين سره برابره ده.
د پخوانيو کلونو په څېر سږ کال هم د جمعيت ګوند او شورا نظار ملاتړو هوډ څرګند کړی، چې د يوه لوی وسلوال مارش په ترسره کولو سره به دغه ورځ لمانځي او په خبره يې د مجاهدينو دښمنانو ته به خپل قوت ښکاره کوي.
د کابل ښاريان د ګارنيزون په دې پرېکړو شک کوي او وايي، چې دولت هيڅکله هم د جمعيت د وسلوالو لنډغرو مخه نه شي نيولی، هغوی وايي چې د سقاو ځوی د بيا خښولو په جنازه کې د امنيت له پلوه دولت کومه لاسته راوړنه نه لرله او په پايله کې يې د جمعيت د وسلوالو او دوستم جنبش وسلوالو تر منځ په نښتو کې ۲ تنه ووژل شول او ۵ نور يې ټپيان شول، چې د دواړو ډلو په راوتلو او په کابل کې يو ځل بيا د کورنيو جنګونو او مليشو زور ازمايلو ښه بېلګه وه.
همدارنګه په کابل کې د ژوندون تلوېزيون ادارې تېره شپه يوه اعلاميه خپره کړې او د نن ورځې په جريان کې يې په کابل ښار کې د احمدشاه مسعود د پلوي ملېشو له خوا د احتمالي نا امنۍ او ګډوډيو د عواقبو په هکله اندېښنه ښکاره کړې ده.
ياده اعلاميه د ژوندون تلوېزيون پر فس بک پاڼه نشر شوې او وايي: چې د احمد شاه مسعود يو شمېر پلويان د هر کال په شان يو ځل بيا غواړي چې په کابل ښار کې د ثبت شويو او نه ثبت شويو وسلو په وسيله خلکو ته خپل زور وښیي او د خلکو د ازار او اذيت سبب شي.
په اعلامیه راغلي، چې دا وسله وال کېدی شي د ژوندون ټلوېزيون او د کابل ښار د هوتخېلو په سيمه او نورو پښتون مېشتو سیمو کې هم خپل زور په ډاګه او ان د خلکو د وژنې او نور وحشت سبب شي.
د ژوندون تلوېزيون اندېښنه کوي او وايي چې «ژوندون ټلوېزيون او د هغه شاوخوا مېشتو ولسونو که څه هم له امنيتي ځواکونو څخه د امنيت د تامين او تضمين غوښتنه کړې، خو څرنګه چې د دې ډول اشخاصو سياسي نفوذ په امنيتي ځواکونو کې هم محسوس دی، نو ځکه خو هغوی هم خپل ملي مسوليت او رسالت ته په اسانۍ سره نه پرېږدي، نو موږ په لومړي ګام کې له ټولو دولتي او امنيتي چارواکو څخه هيله کوو، چې د ژوندون ټلوېزيون او د ورڅېرمه پرتو ولسونو په ګډون د کابل د ټولو ښاريانو امنيت تامين کړي او که چېرې دوی دا مسؤليت نشي ترسره کولای نو بيا خو غيرتي افغان ولس مجبور دی چې د خپل امنيت او حيثيت د ساتلو لپاره په خپله لاس په کار شي. په داسې يو حالت کې که هره ناوړه پېښه رامنځته شوه، مسوليت به يې د جمعيت، نظار شورا او په هغو پورې د اړوندو وسلوالو او حکومتي چارواکو پر غاړه وي.»
نوموړې ادارې پر ولس او حکومتي چارواکو غږ کړی، چې د سنبلې د ۱۸ مې نېټې د احتمالي پېښو ټولو خطرونو ته متوجه شي او د لنډغرو او داړه مارانو د زور کارونې د مخنيوي لپاره د خپلو ټولو امکاناتو څخه کار واخلي.
هر کال د مسعود د تلين د لمانځلو په ورځ په کابل ښار کې د جمعيت لنډه غر د مسعود انځورونه د کابل په واټونو، موټرو ديوالونو باندې نښلوي او وسلوال کسان يې عام ولس ښکنځي، ډزې پرې کوي، خلک ډبوي، لارې بندوي او خلکو ته د تېر کابل د ورانۍ او وحشت ياد ورپه زړه کوي.
د يادونې ده، چې د مسعود د تېر تلين د لمانځلو په ورځ هم، په دهمزنګ او د کابل په زړه کې پر پولیسو او ملي امنيت باندې ډزې شوې وې، ډزې به هغه چا کولې، چې برګې دريشۍ يي پر تن کړې وې او پکولونه يي پر سر کړي و، په تېر تلين کې د لنډغرو د وحشت له امله ډېر موټرونه ټکر شوي و او ډير نور له لارو وتلي و.
د کابل په کابل بای سيمه کې د ۱۳ کلن ماشوم ټپي کول په بګراميو کې په سړک کې ډله ایز ټکر، په دهمزنګ کې پر پوليسو ډزې، د ملي بیرغ پرته د حزبي او اوياوومې لسيزې د وحشي بیرغ بیا رپول د تېر تلين د لنډغرو د وحشت او ډار اچونې، ظلم ښه مثالونه دي.
ويل کېږي چې د تلين په ورځ په کابل کې د همدې تش په نوم جهاديانو په انځورونو پوښل شوي موټر او وسله وال کسان عام ولس ښکنځي، وژني، او بې عزته کوي يې.
د کابل ښاريان وايي، چې کله د شهيد د اونۍ په دې ورځ کابل ښار ته راووځې نو رنګارنګ بیرغونه، خپل سرې ډزې، د عام او پوځي کسانو وهل او ترټل، د چرس څکول د ناقانونه او بې پليټه موټرو، وسلو ګرځول د ښار بڼه بيخي بدله وي او یو ډول وحشت به پکې خپور وي.
ویل کیږي چې، قوماندان احمدشاه مسعود چې په ۱۹۹۰مو کلونو کې یې د خپلو سیالو وسله والو ډلو په وړاندې د کابل ښار په جګړو کې پراخ رول درلود د ۲۰۰۱ کال د سپتمبر په ۹مه د دوه عربانو له خوا چې ځانونه یې ژورنالستان معرفي کړي ول د مرکې پر وخت په کمره کې د ځای پر ځای شوي بم د چاودنې په نتیجه کې ووژل شو، او له هغه وخت راهیسې یې اړوندې ملېشې هر کال په کابل ښار کې تلین په ډېر وحشیانه ډول د وسلو او زور په ښودلو سره لمانځي چې څو ځلې د ښاریانو د مرګ ژوبلې سبب هم ګرځېدلي دي.
