تبصره
اشرف غني او ترې راچاپيره ياران چې له څه ويره لري د هغو پيښوسره مخ کيږي؛ د ۲۰۰۱م کال راپدېخوا چې په افغانستان کې د امريکايي يرغل سره لومړى د کرزي او اوس د اشرف غني حکومت دوام لري همدا وايي چې طالبان دې موږ (حکومت) ته تسليم، وسله دې پر مځکه کيږدي، له ځانه سره به يې ومنو.
د تيرو ١٦ کالو په دوران کې امريکايي جنرالانو او افغان چارواکو د طالبانو پر خلاف ډير تبليغات وکړل، په بيلابيلو نومونو یې ياد کړل خو چې کله یې ترې د کندز ښار ونيوه، د افغان چارواکو او امريکايي جنرالانو غوږونه ځوړند شول. امريکا بيا په قطر کې د طالبانو سره د مذاکراتوهڅې پيل کړې.
تيره اونۍ چې په مسکوکې د چين، پاکستان، هند، ايران او منځنۍ اسيا د يو شمير هيوادونو لخوا د افغان حکومت او طالبانو د پخلاينې په اړه غونډه وشوه، افغان چارواکي او امريکايي جنرالان یې وار خطا کړي چې د مسکو او طالبانو تر منځ اړيکې به په نږديوالي سره، طالبانو ته مشروعيت ورکړي.
افغان چارواکي او امريکايي جنرالان ځانونه له همدې ټکي ساتي چې هغه طالبانو ته د يوه لوري په حيث قانع کيدل دي، چې کله په سياسي لوبو کې څوک مخالف سياست وال د لوري په نامه ومني بيا د مخالف لوري مشروعيت خپله ثابت شي .
د اشرف غني او د هغه د ادارې سره خو په مسکو کې د شوې غونډې په اړه انديښنې اوس نورې هم زياتې شوې چې حامد کرزي رسنيوسره په ويناکې ويلي:
نړیوال قدرتونه له دې پرته چې له طالبانو سره اړیکې وپالې، بله چاره نه لري.
دوېم دا چې د کرزي په وينا طالبان په نيمايي افغانستان اغيزلري، هر هيواد د طالبانو سره د اړيکو ساتلو حقدار دى. اشرف غني پرې ولې انديښمن کيږي؟ بايد اشرف غني د مسکو څخه مننه وکړي چې په تيرو شپاړسو کالو کې طالبان، افغان حکومت سره خبرو ته نه دي راضي شوي او په خپل دريځ کلک ولاړ دي مسکو یې د پخلاينې هڅي کوي بايد د اشرف غني ټولې شته انديښنې له زړه وباسي.
امريکا او روسيې په افغانستان کې خپله زور ازمايي کړې ده؛ اشرف غني یې بايد د دويم ځل لپاره د زور ازمایي مخه ونيسي. امريکا او روسيه په خپلو کې په سوريه کې هم زورازمايي کوي او دا دی اوس یې درېیمه زورازمايي په شمالي کوريا کې پيليږي .
د طالبانو لخوا پر نيم افغانستان اغيز خپله د مشروعيت مسئله روښانه کوي. د اشرف غني انديښنې ته اړتيا نه شته؛ اړتيا د دې ده چې افغانستان د يوه واحد اغيز لاندې راشي او د بهرنيو پوځونو پرته افغانان د خپل هيواد دفاع توان ولري. که اشرف غني د طالب له مشروعيته انديښنه لري نو دا انديښنه هم بايد ولري چې د خپل حکومت مشروعيت یې هم نه شته .
که اشرف غني خپل حکومت ته مشرعيت ورکوي د طالبانو مشروعيت دې ومني بيا به یې شته انديښنې له منځه ولاړې شي.
