تبصره
چې څومره کفري هېوادونه دي هغه ټول د اسلام پر خلاف سره یو دي او د تل لپاره په ګډه دا هڅې کوي چې په نړۍ کې د اسلام د مقدس دین د خپراوي مخه ونیسي. اوس د نړۍ غیر مسلم وګړي هم د اسلام په حقانیت پوهېدلي او د اسلام د مقدس دین مطالعه یې په غور سره پیل کړې ده، دوی ته دا جوته شوې ده چې په نړۍ کې د امن، انسانیت، انسان دوستۍ او د خدای د ټولو مخلوقاتو د درناوي دین د اسلام مبارک دین دی. له همدې ویرې ټول کفري هېوادونه، چې په سر کې یې اسرائیل، امریکا او ډنمارک دي، د مسلمانانو پر خلاف د هر هېواد لپاره تبلیغاتي راډیو ګاني، تلویزیوني چینلونه، بېلابېلې غږیزې رسنۍ او تصویري خپرونې په کار اچولې دي چې بدبختانه په لوړو معاشونو یو شمېر بې ضمیره قلموال، په غلامۍ ګمارل شوي، تش په نامه مسلمانان پکې دندې هم سر ته رسوي.
امریکا، اسرائیلو او ډنمارک په ګډه سره د اسلام له مقدس دین سره د دښمنۍ په ښوولو او د اسلامي مقدساتو په سپکاوي تر ۳۰۰۰ زیات کارټونونه چاپ کړل. هر کال د اسلام د مقدس دین او مسلمانانو پر خلاف دښمنانه حرکت کوي څو د مسلمانانو جذبه او عکس العمل ورته څرګند شي.
کفري هېوادونو، چې په سر کې یې امریکا ده، د ډنمارک د عیسوي کارټونسټانو په وسیله د اسلام د مقدس دین په وار وار سپکاوی وکړ او هر یو یې د سلمان رشدي په څېر د مسلمانانو سره خپله دښمني وښووله.
څو ورځې وړاندې امریکایي الوتکو قصدا په پروان کې د اسلام د سپکاوي لپاره په ډېره سپین سترګۍ د هوا له لیارې هغه پاڼې وښیندلې چې د اسلام او مسلمانانو سپکاوی پکې شوی ؤ.
دا مهال چې په هېواد کې کوم افغانان ژوند کوي هغه ټول امریکا پلوي نه دي، د ګوتو په شمېر څو تنه غلامان، چې د امریکایي او بهرنیو پوځونو د شتون پورې یې نمړۍ غوړه ده، د امریکایي جنرالانو هرې وینا ته لاس په نامه دي، نور په هېواد کې مېشت افغانان له مجبوریته په خپل جګړه ځپلي هېواد کې اوسېږي. ځکه خو د هغو پاڼو په غورځولو، چې محتویات یې د اسلام د مقدس دین سپکاوی بلل کېږي، افغان ولس غبرګون وښود، ځکه خو د اېتلافي ځواکونو قوماندان جیمز لینډر له افغا ولس بخښنه وغوښتله.
ناټو پوځونو د امريکا په مشرۍ په افغانستان کې تر ١٣٠٠ زيات هوايي بريدونه کړي دي چې پکې په ډله ییزه توګه افغانان شهيدان شوي دي. د ناټو پوځونو په ٢٠١٤ز کې پر افغان ولس ١٦٠، په ٢٠١٥ميلادي کې ١٠٣، په ٢٠١٦ کې ٢٢٨ مرګونې بريدونه کړي. هغه بريدونه چې موږ یې کلونه او د بريدونو شمېر په لاس کې نه لرو، تر دې زيات دي.
د ٢٠١٥ز د سپتمبر په ٢٨مه چې مجاهدينو کندز له افغان ځواکونو ونيوه، امريکايي الوتکو په يوه شپه پر روغتون بمبار وکړ، ٦٣ ډاکټران او مريضان یې شهيدان کړل. په بېلابېلو ولاياتو کې پر جنازو او ودونو امريکايي پوځونو بمباري وکړه.
جیمز لینډره! ستا په څېر پخوانیو امریکایي او د ناټو قوماندانانو هم د خپلو کړنو له افغان ولسه بخښنې غوښتې دي، خو تر څو به ستاسې د هوایي ځواکونو بمبارۍ او وژنې وي؟ تر څو به تاسې په ړندو عملیاتو کې زموږ ولسي وګړي شهیدانوئ؟ تر څو به ستاسې د مزدورانو د هوانونو ګولۍ زموږ د ولسي وګړو په کورونو لګېږي او ماشومان به شهیدانوي؟ تر څو به تاسې زموږ ناویانې او زومان د واده په ورځ شهیدانوئ؟ تر څو به تاسې زموږ پر جنازو هم بمبار کوئ؟ او تر څو به تاسې زموږ د مقدساتو سپکاوی کوئ؛ ډیرې بخښنې مو درته وکړې نور زموږ د بخښنو د صبر کاسه هم راډکه شوېده.
د بهرنیو ځانګړو عملیاتو قوماندان جیمز لینډره!
افغانان به کمزوري وي، خو کم همته نه دي. دا چې یو شمېر وطنپلوري درته ناڅي، دا د افغانانو نمایندګان نه دي؛ د دوی پلرونه او نیکونه انګرېز جنرال برنس او روسي جنرال ازاتینوف ته نڅېدلي دي، اوس یې اولادونه تاسي ته ناڅي. که په حکومت کې یو څو چارواکي درته بخښنه وکړي، دا د افغانانو بخښنه نه ده؛ تاسې که ځان ته د خلاصون لار ګورئ، د روسانو په څېر په تېښته به ځان خلاصوئ، په بخښنو نه خلاصېږئ.
