له تیرو ۱۵ کلونو راهیسي د امریکا او ناټو هر لوړ پوړی چارواکی چې افغانستان ته راغلی، د مجاهدینو له ویرې او بیم څخه یې په ښکاره او اعلان شوې بڼه سفر او دوره نده کړي، بلکې په توره شپه افغانستان ته داخل شوی او بیرته یې هم د یو عالم بزدلي او وهم په دنیا کې له افغانستان څخه پښې سپکې کړې دي.
د جمعي په ورځ هم د امریکا د دفاع وزیر ( اشتون کارتر) په همدغسي ناڅرګند او خوف زده حالت کې افغانستان ته راغی، له خپلو پوځیانو او کابل چارواکو سره یې د بګرام او ننګرهار په هوايي میدانونو کې ژر ژر وکتل او بیرته په منډه لاړ.
د امریکا د دفاع وزیر په خپل ورستي سفر کې ننګرهار ته لاړ او په هوايي ډګر کې څوساعته تیرکړل، چې همدغې ایسارتیا یې له خلکو او کارپوهانو سره یو لړ شکوک راپورته کړل؛ ځکه د امریکايي فوځ قومنداني او د سوق اداره په بګرام کې ده، له بله اړخه داسي مهمه پیښه هم په ننګرهار کې نده شوي چې د امریکا د دفاع وزیر په کچه امریکايي چارواکي دې هلته سفر وکړي.
د اشتون کارتر له سفر یوه ورځ وړاندې په افغانستان کې د امریکايی فوځ قومندان جنرال ( کمبل ) په ننګرهار کې د داعش د شتون تر څنګ دا خبره هم وکړه چې د ده په خبره د داعش په لټه کې دی ترڅو ننګرهار د یوې مهمي اډي په شکل کې تقویه او له ځان سره ولري.
د جنرال کمبل له څرګندونوسره هممهاله ننګرهار ته د امریکا د دفاع وزیر سفر دا شکوک تقویه او په حقیقت واړول چې امریکا غواړي د داعش په نوم ډله د افغانانو د ټکولو او کړولو او هم یې په سیمه کې د خپلو خاصو اهدافو د ترلاسه کولو لپاره پیاوړې او ژوندۍ وساتي.
د امریکا د دفاع وزیر له سفر نه څو ورځي وړاندې د داعش له لوري د (خلافت ) په نامه د ایف ایم یوه قوي راډیو چې د ننګرهار په زیاترو سیمو اوریدل کیږي، په فعالیت پیل وکړ، داسې ویل کیږي چې د نوموړې راډیو دستګاه د ننګرهار په هوايی ډګر او یا هم په کومه استخباراتي ودانۍ کې نصب شوې؛ ځکه د نشراتو او زهرجنو تبلیغاتو بڼه او صراحت یې چې له سره ترپایه د جهادي معتقداتو ټکول او د افغانانو د میړانې او شجاعت ځپل دي، دا حقیقت جوتوي چې د دغې راډیو تمویل او حفاظت به ارومرو د کابل او امریکايي قواوو خاص استخباراتي چینلونه ترسره کوي.
داسې راپورونه دي چې د ننګرهار د امنیت ملي ریاست، د افغاني داعشیانو لسګونه افراد چې ظاهرا ځانونه د خراسان له داعشي مشر سیدخان سره مخالف او ناراضه بولي، په څنګ کې لري او له هغو استفاده کوي.
په دې ورستیو کې د برتانيې یو مشهور اخبار ( دي مرر) راپور ورکړی چې د (VandaSec) په نامه هیکرانو یوې پیاوړې ډلې په انټرنیټ کې په هغو اکانټونو او پاڼو باندې څیړنه کړې چې په ښکاره ډول تر داعش پورې تړاو لري او د هغوی نمایندګي کوي، د هیکرانو یادې ډلې کره معلومات وایي چې په ظاهره خو د دغو اکانټونو آی پي ادرسونه سعودي هیواد په ګوټه کوي؛ خو هغه مهال چې دوی په خپله څیړنه کې له یوه ځانګړي تخنیک او پروګرام نه کار واخیست نو جوته شوه چې دغه اکاونټونه له سعودي هیواد نه بلکې د برطانیې د (Department of work and pensions) او هم د امریکا د څارګرې شبکي ( c.i.a) ادارو پورې تړاو لري.
د هیکرانو د دغې پیاوړې ډلې یو غړي له نوموړي اخبار سره په خبرو کې وویل: د دغو ادرسونو له لارې نه یوازې د داعش ډلې پیغامونه نشریږي بلکې له دغو لارو شام، عراق او اوس تازه افغانستان ته د ځوانانو سوق او لیږدولو پروګرامونه هم تر سره کیږي.
پورته شواهدو او دلایلو ته په پام ویلای شو چې د امریکا د دفاع وزیر سفر ننګرهار ته قطع د دې لپاره ندی شوی ترڅو په هغه ولایت د داعش د ګواښ او خطر د مخنیوي په باب لکه دوئ چې وايي کوم تصمیم نیولی وي، بلکې کره معلومات دا دي، چې امریکایان هڅه کوي ترڅو په ننګرهار کې د داعش جرړې او ریښې محکمې او نوري وځغلوي او افغانانو ته نوي کړاوونه رامخي ته کړي.
