دجدي ۶مه ، اورونه او ويرونه
ليکنه : حکيم الله “پکتياوال”
دواړه خواوې دجګړې په ډګر کې :
قرآن کريم په دې خبره شاهد دی چې ډېر ځلې کمه ډله پرلويه ډله برلاسی مومي؛ نو موږ ته دتاريخ د شاليد ترمخې دا جواتېږي ، چې هروخت د مسلمانانو کم او تش لاسي ټولګي ، د پر مختللو وسايلو سمبال لښکرو ته تاريخي ماتې ورکړي دي . د افغان ولس هرمقاومت چې دعقيدې او ايمان په زور ولاړ دی ،ځکه يې د هر مغرور شيطان ياغي باغي ککرۍ دخارو تل ته ښکته کړي دي .په تېره بيادسرو لښکرو پروړاندې يې په ډېرکم تعداد او پوځي وسايلو خو په قوي ايمان نه ستړېدونکې جګړې ترسره او مات ګوډ يې له خاورو وشړل او بېشماره غنايم يې ترلاسه کړي . ددې جهادي پېر له کرامت څخه ډکې معرکې ډېرې زياتې دي؛ خو دلته يې دارغنداب او د ژورې په دوو معرکو بسنه کوو:
الف: په ۱۹۸۸کې دکندهارولایت دارغنداب سېمې ته د (په افغانستان کې دروسي قواوونظامي مشر) جنرال بوریس ګروموف په مشرۍ دشورويانوترټولو ستره قوه راغله چې په خورا زيات شمېرالوتکو ،ټانګونو ،زرپوښونواوپه هرډول پوځي وسایطومجهزه وه ، کله چې دجګړې لمبي پورته شوې نو په جنوب غربي حوزه کې دارغنداب دمجاهدینو عمومي قوماندان ملانقیب الله دخپلو ټولو مجاهدينو په ګډون ددغې سترې قوې لخوا ۳۳ ورځي محاصره شول . شهيدملابورجان رح چې دامهال دپاشمولاومحله جات په سیمه کې و،خبر ورسيد ،سره له دې چې دهغه له مکلفيت څخه لوړه پېښه وه ؛ خو دا يې ونشوای زغملای چې په ارغنداب کې دې دده نور مجاهدین وروڼه دروسانو تروژونکو بمباریو لاندې محاصره پاتې شي . هماغه و، چې دخپلو سرښېدونکو غازيانو په شمول پرهماغې سیمې ورغی او د مست شاهين په څېر يې په شوروي پوځ پرلپسې تکتیکي حملې وکړې چې په نتيجه کې يې دښمن مات اومجاهدین یې دمحاصرې څخه راخلاص کړل .
ج: د۲۰۸۵زکال داپرېل په ۲مه نېټه دشوروي او کمونيستي ځواکونو ۱۵۰۰۰قوې په لويه پکتياکې او په ځانګړي ډول دژورې جهادي مرکز باندې پراخل عمليات پېل کړل.دشوروي ځواکونو مشري (په افغانستان کې دشوروي ځواکونو نظامي مشر) جنرال بوريس ګروموف او د کمونيستي ځواکونو مشري دلوی درستيز جنرال شاه نواز تڼي په غاړه وه . بلې خواته دژورې مجاهدينو مشري پخپله دسترمجاهدمولوي جلال الدين حقاني په غاړه وه . دژورې جګړې پوره ۲۸ورځې دوام وکړ او روسي بم غورځونکو الوتکو به هره ورځ دژورې په اسمان ۴۰۰الوتنې کولې او خروار بمونه به يې دمجاهدينو په سنګرونو غورځول. په نتيجه کې ددښمن ۱۵۰زغروال وسائط تخريب او ۱۵ هيليکوپترالوتکې راوغورځولې.
دې جګړې تاريخ ته ثبت کړه چې دافغان خاوره شوروي جګړه مارانو ته ددوزخ يوه توټه وګرځول شوه او دافغان غازي له دهشت څخه به يې زره به چاودېدو وه ، لکه : يو روسي جنرال ((اليچ پشماكوف))چې دکره باغ په سېمه کې دمجاهدينو لخوا وژل شوی و ،ديادښت په کتابچه کې يې لاندې څلوريزه په روسي ژبه ليکې وه ،چې ترجمه يې داده:
خداى (ج) ده ناز او مهرباني پيدا كړې
شيطان ماشيندار او پوځي خولۍ پيدا كړې ده
خداى(ج) جنت پيدا كړى
شيطان د افغانستان خاوره پيدا كړې.
د شوروي اتحاد د ماتې عوامل:
په افغانستان کې دشوروي لښکرو دماتې ډېر عوامل دي چې ځينې يې دا دي :
۱): دافغان ولس وسلواله جهادي مقاومت .
۲): د شوروي اتحاد اقتصاد کمزوری کېدل او مخ په زوړ کېدل .
۳): دشوروي اتحاد خپلمنځي اختلافات زياتېدل او پراخېدل .
۴): دکارمل بې کفايته اداره او ولس ترمنځ فاصله .
۵): داسلامي نړۍ لساني، قلمي ،مالي او ځاني جهاد .
دا تول عمده عوامل دي ، چې دروسي استکبار ستره امپراتوري يې دړې وړې کړه .
دروسانو جګړ ييز ماموريت دحضور موده :
شوروي ځواکونه پوره ۹ کاله او ۵۳ ورځې په افغانستان کې په جګړه کې ښکېل پاتې شول او د ۱۳۶۷هـ،ش کال د د لوې په ۲۶ مه د افغانستان له پاکې خاورې څخه پليتې ښپې سپکې کړې.
وروستی روسي عسکر :
دشوروي استعمارچيانو اووه ورځې کم لس کاله په هېواد کې پر خونړۍ جګړې تېر ،په پای کې له يوې شرمېدلې ماتې سره له افغانستانه ووتل . د شوروي پوځونو وروستی عسکر( جنرال ګروموف) د حیرتان بندرله لارې؛ له افغانستانه ووت. کله چې ګروموف د افغانستان د پولې په څنډه ودرېد او سپېره موسکا يې پر شونډو خوره وه، چې دشوروي لښکر تاريخي پښېماني او د دغه ملت دوسپنيزمقاومت شوکت په کې له ورايه ښکارېده.
دافغانستان جګړه ټولې نړۍ ته امن :
دکاېناتو سترڅښتن دافغان سپېڅلو مجاهدينو په لاس د سره استعمار اوياکلنه ستره سوسياليستي (ورسا) امپراتوري دړې وړې کړه .دافغانستان دجهاد له برکته نه يوازې داچې افغان قوم دازادۍ ، فتحې او نړيوال اتلتوب وياړ ترلاسه کړ؛بلکې ټوله نړۍ دشوروي وحشيانو له شره خلاصه شوه او په ځانګړي توکه : دمنځنۍ اسيا هېوادونو ؛ پاکستان ،ايران ، هند دژوند ساه واخيسته . او تاجکستان ،ارمنستان ،ترکمنستان،ازبکستان،قزاقستان اونورو رياستونو خپلواکي ترلاسه کړه .
