کابل ټکی کام ۲۱وږی/۱۳۹۴
راپور: انصار
د هند مدهیه پردېش ایالت کې د ګاز ډبې د چاودنې له امله د ۲۰ تنو د وژل کېدو خبر ورکړل شوی دی.
د هندي پولیسو په وینا په مدهیه پردېش ایالت کې په یوه رسټورانټ (مېلمستون) کې د ګازو یوه لویه ډبه هغه وخت و چاودېده چې د ښوونځیو زده کوونکو او نورو عامو مېلمنو په هوټل کې د څاښت مهال چایو په څکلو او خوراک بوخت وو.
هندي پولیسو رسنیو ته ویلي چې چاودنې د هوټل او هوټل ته څېرمه ودانیو ته هم تاوان رسولی دی.
د هندي پولیسو په وینا تر دې دمه په هوټل کې د وژل شویو کسانو شمېر شلو ته رسیږي، خو دا چې مرستندویه کسان د مړو او ژوبلو په را ایستلو بوخت دي، امکان لري چې د مړو شمېر نور هم زیات شي.
