په اذان کې سوز او درد د بلال نشته په شپېلۍ باندې مې ویښ کړه له خومـاره- غزل / استاد فضل ولي ناګار

استاد فضل ولي ناګار

رنګ یې واخیست ستا د سترګو له ځمیاره
له ګلونو نه دې ډکه کړه هینداره

اننګي دې له خندا رنګیني اخلي
په لالونو کې ږلۍ ده را ایساره

د غاټولو ټله! ټال په نسیم وخوره
شه بهیر د شفقونو تر سهاره

په اذان کې سوز او درد د بلال نشته
په شپېلۍ باندې مې ویښ کړه له خومـاره

د خیبر فضا توريږې ورېځې راغلې
ښـکلې زاڼې پاتې نه شي له کتاره

ستا کوڅه کې پرې نازل عجیبه کیف شو
ناګار ومونده جنت ته لنډه لاره