عبد الله احمدي
د جدې شپږمه د ګران هیواد په تاریخ کې د هغې ورځې په نوم ثبت ده چې له ځان سره د غمونو، قتلونو، ظلمونو، وحشتونو،ورانیو، مهاجرتونو او دربدریو پوره پوره فصلونه او بابونه لري.
په دې ورځ ۱۳۵۸ لمریز کال د جدې په شپږم تاریخ د افغانستان په پاک حریم باندې سرو لښکرو د کور، ډوډۍ او کالیو تر عنوان لاندې د یو شمیر بزدله، بې ننګه او پردیپاله تش په نوم افغاني څېرو په ملتیا او ښکاره مرسته ناروا بربنډ وحشیانه تیری او یرغل وکړ. د وخت ایجنټ ولسمشر حفیظ الله آمین یې وواژه او د هغه پر ځای یې ببرک کارمل په خپلو ټانګونو سپور کابل ته راووړ او د افغان مسلمان په ګدۍ یې د نانځکې په څیر کښېناوه.
ډیر ژر یې په بې دریغه توګه ظلمونو او وحشتونو ته مخه کړه.
د پوهنځيو او پوهنتونونو محصلین د لمونځ په تور، ملک او ارباب د فېوډال په ګناه، ملا او عالم د دین په ګناه، نظامیان او حتی خپل مشران یې د امپریالیزم سره د تړاو په تور او عام افغانان یې په دې تور چې د خلق ډيموکراټيک ګوند غړیتوب نلري پولیګونونو، زندانونو او ژوندي ورک کړل. شاګرد استاد او استاد شاګرد له منځه یووړ. دا ورځ یقینا د افغان په تاریخ کې د ظلمونو او وحشتونو یو بې سارې ورځ او د عجیب غیر معقول اوښتون ورځ وه.
کابل په پوهنتون کې د الحاد، بې دیني درسونه پيل او لمونځ د اخوانیتوب نښه وه.
دغه یرغل په افغانستان کې د ناخوالو، وژنو، بې ثباتۍ او جګړې اوربل کړ، چې تراوسه یې لمبې د افغانانو له هډونو پورته کېږي او پکې رغړي.
نړیوالو او په ځانګړې توګه روسيې داسې انګېرلې وه چې افغانستان به هم د نورو هېوادونو په څېر مستعمره کړي او د خپلې جغرافیې برخه دې وګرځوي، خو دوی ته معلومه نه وه چې افغان شاه زلمو د بهرنیو اشغالګرو په وړاندې له تیکو تورې را بهر کړې اوپه شرنګ يې سرو پوځي لښکرو ته ماتې ورکړه او په ګونډو يې کړل.
د مجاهد ملت دغه اتلولې او مېړانه د هېواد د تاریخ پر پاڼو په طلايي کرښو ثبت او خوندې شوې ده.
د روسیې په زرګونو پوځيان، زغره وال ګاډې، الوتکې او نور جنګي تجهیزات او وسلې له خاورو سره خاورې شوې. بالاخره د الله په نصرت دا فغان مسلمان ولس په قوي عزم او مړانه ټیټ سرونه او په شرمناک ډول د مېړنیو له ټاټوبي (افغانستان) څخه ووتل.
دې ورځ له ځان سره څه راوړل او څه یې را څخه یووړل؟ په لنډ ډول یې یادونه کوم:
۱ــ د کمونیزم وحشي صفته مفکوره یې په افغان مسلمان ولس کې تر ډیره حده خوره کړه خو لله الحمد د روسانو په ماتې سره د کمونیزم څادر هم په ټولېدو شو.
۲ــ په دغه ستره غمیزه کې د ګران هېواد ډیری ودانۍ په کنډوالو بدلې شوې، نږدې دوه مېلیونه افغانانو د شهادت جام پر سر واړوه او په همدومره اندازه نور ټپیان او زخمیان شول، چې تراوسه یې د میندو اوښکې لا وچې نه دي.
۳ـــ د لس میلونو په شاوخوا کې افغانان بې کوره پاکستان، ایران او نورو هیوادونو ته مهاجر شول او تر نن ورځې په هغو هیوادونو کې بې برخلیک پراته دي.
۴ــ د افغانستان د څلویښت کلن بحران اساس او تهداب له همدغه وخت نه شروع شو چې تر ننه یې له میکروبه افغانان کړیږي.
۵ ــ ﺩﺧﻠﮑﻮ ﺗﺮﻣﻨځ ﺩﺑﯥ ﺑﺎﻭﺭﻱ ﺗﻮﺭﻩ ﻓﻀﺎ ﺭﺍﻣﻨځﺘﻪ ﺷﻮﻩ، مختلفې ډلې ټپلې، احزاب او ګوندونه جوړ شول چې هر یو یې د افغانانو په زورلو کې تر بادار په نمبرو کې مخته وو.
۶ ــ د مظلومو افغانانو په وینو رنګ سره ورځ!
د ګران هیواد د مادي او معنوي تباهۍ پیلامه!
د یو اتل ملت د خپلواکۍ پر ویاړلي تاریخ د غلامۍ تور داغ!
پر انسانیت د حیوانيت( کمونیزم) نظریې د پلي کولو هڅه!
پر عدالت د بربریت د حکومت پیل!
باالاخره د افغان ملت د ټولو بدبختیو او ناخوالو دریڅه!
د کور، کالي او ډوډۍ غولوونکې شعار خپله اصلي بڼه افغانانو ته ښودله چې زه د کور پر ځای قبر د کالیو پر ځای کفن او د ډوډۍ پر ځای ویني ور کوم.
دغه ورځ که له يوه لوري زموږ د هيواد د اوږدو ناخوالو د پيل ورځ ده له بل لوري د نړۍ پر مخ د لوى زبرځواک د سرکشۍ او غرور د ماڼۍ د نړيدلو او نسکوريدلو د پيل ورځ هم ده.
همدا راز د کمونیزم د ګنده او لغوړنې نظریې د شکست د شروع ورځ هم بلل کیږي.
د هر يرغلګر لپاره د عبرت درس هم له ځان سره په برملا تورو لري. دغه ورځ که له يوه لوري زموږ د هيواد د اوږدو ناخوالو د پيل ورځ ده له بل لوري د نړۍ پر مخ د لوى زبرځواک د سرکشۍ او غرور د ماڼۍ د نړيدلو او نسکوريدلو د پيل ورځ هم ده.
دغه راز ستره حماسه د نړۍ پر مخ د يوه نيم ملت په تاريخ کې ځاى پر ځاى شوى دا تاريخې قدم زموږ ملت ته يو لوى ارزښت دى د يرغل او استبداد په وړاندي قيام چې لوى واړه، نر او ښځې پکې دخپلې عقيدې او وجدان په پريکړه برخه اخيستې وه سپيڅلى قيام وو.
پدې لاره مرګ وياړ, ستړیا يې د ستر رب رضا او تويه شوې هر څاڅکى وينه له شک پرته د نړۍ قيمت بها وينه ده.
دا راز دغه ورځ نني یرغلګر او دهغوی حلقه بګوشو غلامانو ته یو رسا او واضح پیغام ورکوي چې که هر څومره په قوت، دبدبه او زور کې یاست بیا به هم د افغانانو په دیار کې له ستر شکست سره مخ کیږي ځکه دلته تاسو پردي یاست.
دغه ورځ او پیښه د کمونیزم ټولو پیروانو او د هغوی افغاني لاسپوڅو ته د شرم وړ او اتل افغان ملت ته یې د دوی د سرښندونو او میړانو له امله د افتخار وړ ګڼم.
لکه څنګه چې د جدې شپږمه د کمونیزم د څادر د شکېدلو سبب شوه، غربي حاکمي لیبرالې ډیموکراسۍ ته دا پیغام ورکوي چې ستا ناولی کمیس به هم په افغانستان کې د غیورو افغانانو په لاس څیري کیږي، ځکه دلته هر هغه نظریه او فکر چې له سالم انساني فطرت سره تصادم کې وي پایښت نه مومي.
د دې جغرافیې وګړي موحدین او د اسلام مبارک دین منونکې دي غیر له اسلام څخه د بلې هرې نظریې چې د بشر په مټ یې تهداب اېښودل شوی وي سر سخت مخالف دي که څه هم یو څه وخت د قدرت په زور په خلکو حکومت وکړي خو ماتې به یې په قسمت کې حتمي وي.
نني د امریکا لاسپوڅي او ملاتړې باید له دې ورځې څخه عبرت واخلي چې بهرنی اشغال هیڅ وخت دائمي نشي پاته کېدای که هر څومره د قدرت، زور او وسلو خاوندان وي د روسانو په څیر به له شرمه ډکه ماتې خوري او په ټیټو سترګو به له ګران هیواد څخه د الله په نصرت سره وزي چې ستاسو لپاره به بیا یو لوی شرم او عار وي او په مړو څټو به د افغانانو رحم وکرم ته پاته یاست.
غیورو او زړورو افغانانو ته دا وایم چې له امریکایي اشغال څخه د خلاصون هلې ځلې نوري هم باید تیزي کړئ، نوره یې وینه په ختمېدو ده، دا ځل چاته اجازه مه ورکوئ چې یو ځل بیا ستاسو په برخلیک لوبي او مزې چړچې وکړي بلکې د یو پرمختللي اسلامي افغانستان د جوړولو لپاره له ناجي ګروپ سره یو ځای شئ او د هیواد داخلي خائینو کړیو ته د لاسوهنو مجال مه ور کوئ خدای مه کړه د یو بل ناورین په لور مو بوځي.
